Bu D. Ben Rees yn Weinidog ffyddlon gydag Eglwys Bresbyteraidd Cymru yn Lerpwl a'r cylch am drigain mlynedd. Mae'n ymddiddori yn hanes y genhadaeth a chyhoeddodd doreth o gyfrolau dros y blynyddoedd yn y maes hwn.
Gwybodaeth Bellach:
Dr Bobi Jones oedd y gŵr a fu'n pwyso arnaf i fynd ati i gasglu ynghyd gyfrol boblogaidd ar y cenhadon a aeth allan o Gymru i'r meysydd cenhadol.
Yr oedd ef wedi croesawu'n gynnes yn ei adolygiadau gwerthfawr y cyfrolau a luniais sef, Llestri Gras a Gobaith: Y Cymry a'r Cenhadon yn yr India
, cyfrolau Cymraeg a Saesneg ar Josiah Hughes, y cenhadwr cyntaf o blith Cymry Lerpwl, ac ar y Dr H. Gordon Roberts, a fu'n gyfrifol am weld agor Ysbyty yn enw Cenhadaeth y Methodistiaidd Calfinaidd yn Shillong. Y mae enwau eraill o Gymru wedi bod yn weithgar hefyd ar y maes cenhadol, ac ymdrech a geir yn y gyfrol hon i gynnwys hanesion o'r holl enwadau o Gymru a yrrodd weithwyr i bedwar ban byd. - D. Ben Rees
